Kryetari i Stambollit, Ozgur Celik, dhe 195 zyrtarë të tjerë u shkarkuan nga postet e tyre për shkak të parregullsive në fillim të kësaj jave
Nga Alex MacDonald
Partia kryesore opozitare e Turqisë, Partia Republikane Popullore (CHP), do të mbajë një kongres të jashtëzakonshëm më 21 shtator, pasi një gjykatë shkarkoi udhëheqjen e saj në Stamboll për shkak të parregullsive. Ndërkaq partia thotë që akuzat ishin të motivuara politikisht.
Në fillim të kësaj jave, një gjykatë anuloi rezultatet e kongresit provincial të partisë në Stamboll të tetorit 2023, duke çuar në shkarkimin e kryetarit provincial Ozgur Celik dhe 195 zyrtarëve të tjerë.
Gjykata e 45-të Civile e Shkallës së Parë tha se pretendimet për parregullsi në kongres ishin “të provuara”.
Gjykata emëroi një ekip prej pesë anëtarësh për të zëvendësuar udhëheqjen, përfshirë ish-deputetin Gursel Tekin, i cili dha dorëheqjen në shkurt 2024 për shkak të ndryshimit në udhëheqjen kombëtare.
Lajmi për vendimin bëri që bursa turke të bjerë me 5.5 për qind.
Një burim i tha AFP-së se CHP do të mblidhte kongresin e saj të jashtëzakonshëm mes frikës se shkarkimi i kryetarit të saj në Stamboll mund të ishte një pararendës i një vendimi të ngjashëm kundër udhëheqjes kombëtare.
Kryetari Ozgur Ozel dhe aleatët e tij aktualisht janë të përfshirë në një proces ligjor pothuajse identik, i cili do të rifillojë në Ankara më 15 shtator.
CHP, partia më e madhe opozitare e Turqisë, ka akuzuar Presidentin Rexhep Tajip Erdogan dhe Partinë për Drejtësi dhe Zhvillim (Partia AK) në pushtet se po i shënjestrojnë ata pas suksesit të saj të gjerë në zgjedhjet lokale të vitit 2024.
Kryebashkiaku i Stambollit, Ekrem Imamoglu, një lider popullor i opozitës dhe kandidat i ardhshëm presidencial që potencialisht mund të sfidojë Erdoganin, u arrestua më 19 mars.
Një numër kryebashkiakësh, zyrtarësh dhe politikanësh të tjerë të CHP-së gjithashtu janë përfshirë në arrestime që atëherë.
