Në prag të vitit të ri shkollor, Sindikatat e Bashkuara të Arsimit, Shkencës dhe Teknologjisë (SBASHK) kanë përsëritur se mbeten të gatshme të ndërmarrin veprime sindikale, përfshirë edhe grevën, nëse nuk nis dialogu me institucionet për adresimin e kërkesave të tyre.
Më herët, SBASHK kishte vendosur një afat deri më 20 shtator për fillimin e bisedimeve me Ministrinë e Arsimit, Shkencës, Teknologjisë dhe Inovacionit (MASHTI). Në mungesë të përparimit, sindikata paralajmëroi mbledhjen e Këshillit Drejtues për shqyrtimin e situatës dhe për të vendosur mbi hapat e ardhshëm.
Deklarata e sotme e SBASHK-ut
Në një njoftim për media të publikuar sot (20 gusht), SBASHK theksoi se situata është e ndërlikuar nga fakti se vendi ende nuk ka institucione funksionale, gjë që e pamundëson dialogun e drejtpërdrejtë. Megjithatë, sindikata konfirmoi se është e gatshme për të dyja rrugët: dialog apo veprime sindikale.
“Duke parë se ende nuk kemi institucione me të cilat do të dialogonim, apo ndaj të cilave do të drejtoheshin veprimet sindikale, SBASHK-u deklaron se është i gatshëm për veprime – qoftë për takime e dialog, qoftë për veprime sindikale e grevë”, thuhet në komunikatë.
Në këtë takim të mbajtur sot nga Kryesia e SBASHK-ut, me pjesëmarrjen e disa kryetarëve të nivelit komunal dhe universitar, u analizua situata aktuale dhe u shpreh shqetësimi për mungesën e institucioneve me të cilat do të zhvillohej dialogu. Sindikata rikujtoi se kërkesat e saj janë të bazuara në vendimin e Kongresit të Jashtëzakonshëm, ku u përcaktua që ato të realizohen me dialog deri më 20 gusht, në të kundërtën të bëhen përgatitje për veprime sindikale.
Greva, opsion i hapur
Sipas SBASHK-ut, nëse institucionet nuk tregojnë gatishmëri për dialog, nuk përjashtohet as greva e përgjithshme në arsim. Qëndrimi i sotëm lë të hapur mundësinë që sapo të krijohen institucionet e reja, sindikata të nisë menjëherë qoftë negociatat, qoftë aksionet sindikale.
SBASHK e ka bërë të qartë se veprimet e saj do të varen nga “zëri i anëtarësisë” dhe nga gatishmëria e Qeverisë e MASHT-it për të adresuar kërkesat që kanë të bëjnë kryesisht me përmirësimin e kushteve të punës dhe respektimin e të drejtave të mësimdhënësve.
