Prokuroria e Gjilanit publikon të dhëna të reja për të kaluarën penale të Mefail Shkodrës dhe lidhjen e djemve të tij me krimin
Prokuroria Themelore e Gjilanit ka bërë publike informacione të reja lidhur me historikun penal të Mefail Shkodrës, duke sqaruar edhe pozicionin ligjor të dy djemve të tij, Edonis dhe Engjëll Shkodra.
Sipas të dhënave të kësaj prokurorie, që nga viti 2000 ndaj Mefail Shkodrës janë evidentuar gjithsej pesë raste penale. Në katër prej tyre, organet e drejtësisë kanë ngritur aktakuza. Konkretisht, bëhet fjalë për lëndët me numër PP.II.300/2005, PP.II.394/2011, PP.II.1091/2014 dhe PP.I.154/17. Ndërkaq, rasti i vitit 2023, i regjistruar si PP.II.913/2023, është zgjidhur përmes procedurës së ndërmjetësimit.
Në të njëjtin njoftim, prokuroria ka bërë të qartë se, në lidhje me Edonis Shkodrën dhe Engjëll Shkodrën, nuk ka pasur asnjë rast të proceduar në Prokurorinë Themelore të Gjilanit në cilësinë e të dyshuarve.
Institucioni ka theksuar angazhimin e tij të vazhdueshëm në luftimin e kriminalitetit dhe ka bërë thirrje për bashkëpunim nga qytetarët, duke i inkurajuar ata të raportojnë çdo informacion që mund të ndihmojë në hetimet dhe ndjekjen penale të autorëve të veprave kriminale.
