Pas vrasjes së trefishtë që tronditi Gjilanin, hetimet kanë marrë një kthesë të re. Policia e Kosovës ka përditësuar njoftimin për kërkim, duke shpallur si të dyshuar jo vetëm Mefail Shkodrën, por edhe dy djemtë e tij, Edonis dhe Engjull Shkodra. Të tre, banorë të Gjilanit, dyshohen për përfshirje në krimin e rëndë që ndodhi sot në rrugën “Ibrahim Rugova”.
Bazuar në autorizimin e Prokurorisë Themelore të Gjilanit, policia ka bërë thirrje për bashkëpunim nga qytetarët dhe mediat me qëllim të lokalizimit dhe arrestimit të tyre. Për të lehtësuar procesin, janë publikuar fotografitë e të tre të dyshuarve.
Policia kërkon që çdo person që ka informacion rreth vendndodhjes së tyre të lajmërojë menjëherë autoritetet. Të gjitha të dhënat e ofruara do të trajtohen me konfidencialitet të plotë.
Mënyrat për të kontaktuar Policinë e Kosovës:
- Stacioni më i afërt policor
- Aplikacioni digjital “Lajmëro Policinë”
- E-mail: [email protected]
- Numrat e telefonit: 192 ose 03850807001
Rasti i tmerrshëm i së dielës rezultoi me tre viktima. Të dyshuarit ende janë në arrati, ndërsa hetimet po vazhdojnë intensivisht për të zbardhur plotësisht motivin dhe rrethanat e këtij krimi.
