Një tren pasagjerësh me rreth 100 persona në bord doli nga shinat në Gjermani të dielën mbrëma, duke shkaktuar vdekjen e të paktën tre personave dhe plagosjen e dhjetëra të tjerëve, sipas autoriteteve.
Ngjarja ndodhi në një zonë të pyllëzuar pranë qytetit Riedlingen, në shtetin Baden-Württemberg në jugperëndim të vendit, rreth 158 kilometra në perëndim të Mynihut.
Në mesin e viktimave ishin makinisti i trenit dhe një punonjës i operatorit shtetëror të hekurudhave në Gjermani.
Nga aksidenti mbetën të plagosur 50 persona, 25 prej të cilëve në gjendje të rëndë.
Autoritetet janë duke hetuar shkaqet e aksidentit. Operatorët njoftuan se qarkullimi është pezulluar në një segment prej 40 kilometrash të kësaj linje.
Ministri i Brendshëm i Baden-Württemberg, Thomas Strobl, deklaroi se më herët në rajon kishte pasur stuhi të forta dhe hetuesit po shqyrtojnë mundësinë që reshjet intensive dhe një rrëshqitje dheu e lidhur me to të kenë shkaktuar aksidentin.
“Nuk përjashtohet që shirat e rrëmbyeshëm dhe një rrëshqitje dheu të kenë qenë shkaku. Por kjo është ende objekt hetimi,” tha ai.
Treni ishte nisur nga qyteti Sigmaringen dhe po udhëtonte drejt Ulmit në momentin që doli nga shinat.
Kancelari gjerman Friedrich Merz, përmes një postimi në rrjete sociale, shprehu ngushëllimet për familjet e viktimave. Ai theksoi se është në kontakt të ngushtë me ministrat e Brendshëm dhe të Transportit dhe u ka kërkuar atyre të sigurojnë të gjithë mbështetjen e nevojshme për shërbimet e emergjencës.
Pamjet nga vendi i ngjarjes treguan vagonë të verdhë dhe gri të përmbysur, ndërsa zjarrfikësit dhe shërbimet e emergjencës po përpiqeshin të nxirrnin pasagjerët.
Sipas televizionit lokal SWR, helikopterë mbërritën menjëherë pas aksidentit për të transportuar të plagosurit në spitale të zonës, ndërkohë që u angazhuan edhe mjekë emergjence nga spitalet më të afërta.
Shefi ekzekutiv i Deutsche Bahn, Richard Lutz, deklaroi se do të vizitojë vendin e aksidentit të hënën. Ai shprehu tronditjen dhe pikëllimin e thellë të kompanisë për ngjarjen dhe falënderoi të gjitha ekipet e emergjencës dhe vullnetarët për ndihmën e tyre.
“Ngushëllimet e mia më të sinqerta i shkojnë familjarëve të viktimave. Uroj shërim të shpejtë dhe të plotë për të plagosurit,” shtoi ai.
Sipas agjencisë zyrtare DPA, operatori hekurudhor ka vënë në dispozicion një linjë telefonike falas për të afërmit e prekur nga aksidenti. Janë ofruar gjithashtu edhe mbështetje psikologjike dhe ndihmë shpirtërore për udhëtarët dhe punonjësit e përfshirë.
Transporti hekurudhor në Gjermani shpesh kritikohet për infrastrukturën e vjetëruar dhe për vonesa të shpeshta apo probleme teknike. Qeveria ka premtuar investime prej qindra miliarda eurosh për të modernizuar rrjetin hekurudhor në vitet në vijim.
Në qershor 2022, një tjetër tren doli nga shinat pranë një vendpushimi në Alpet bavareze, duke shkaktuar vdekjen e katër personave dhe plagosjen e dhjetëra të tjerëve.
Aksidenti më i rëndë hekurudhor në historinë e Gjermanisë ndodhi në vitin 1998, kur një tren me shpejtësi të lartë doli nga shinat në Eschede, në Saksoninë e Ulët, duke lënë të vdekur 101 persona.
Megjithatë, udhëtimi me tren në Gjermani mbetet dukshëm më i sigurt se udhëtimi me makinë. Sipas Zyrës Federale të Statistikave, vetëm në vitin 2024 janë regjistruar 2,770 viktima nga aksidentet rrugore në vend.
