Policia e Kosovës ka lëshuar një njoftim ku kërkon ndihmën e publikut për identifikimin e një personi të dyshuar për sulm. Ngjarja ka ndodhur më 25 prill 2025, rreth orës 09:00, pranë qendrës tregtare “Interex” në Prizren.
Sektori Rajonal i Hetimeve pranë Drejtorisë Rajonale të Policisë në Prizren është duke hetuar këtë rast, i cili klasifikohet si vepër penale e “Sulmit”. Sipas njoftimit, një person i rritur (i paidentifikuar) dyshohet se ka ngacmuar dhe sulmuar një të mitur me inicialet D.O..
Fotografia e të dyshuarit është siguruar nga kamerat e sigurisë, por deri më tani nuk është bërë e mundur identifikimi i tij. Për këtë arsye, Prokuroria Themelore në Prizren ka autorizuar publikimin e fotos në media dhe rrjete sociale, në bazë të nenit 76, paragrafi 2 i Kodit të Procedurës Penale të Republikës së Kosovës.
Policia kërkon bashkëpunimin e qytetarëve për të ofruar informata që mund të ndihmojnë në identifikimin dhe arrestimin e këtij personi. Kushdo që ka informacion ose e njeh vendndodhjen e të dyshuarit, ftohet të kontaktojë Policinë në Prizren duke përdorur numrin 192, nëpërmjet rrjeteve sociale, faqes zyrtare të Policisë së Kosovës në Facebook, ose duke shkuar në çdo stacion policor në vend.
