Pas shumë aksioneve në zona të ndryshme të vendit kundër kultivimit të lëndëve narkotike, policia ka tentuar të hyjë në Lazarat për kontroll, por është pritur me armë. Për pasojë, një person ka mbetur i plagosur rëndë, i cili dyshohet se është qëlluar nga kultivuesit e drogës, ndërkohë që policia është tërhequr mbrapsht, duke rikthyer në vëmendje tentativat e dështuara të policisë për të vënë nën kontroll fshatin rebel.
Prej disa javësh, krerët më të lartë të policisë kanë pretenduar se uniformat blu janë të pranishme në Komunën e Lazaratit, e njohur botërisht për kultivimin në masë të lëndëve narkotike dhe për paprekshmërinë nga shteti shqiptar. Por, në asnjë moment nuk është deklaruar se çfarë bëhet konkretisht nga policia në këtë zonë “të ndaluar” dhe a ka pasur ndonjë goditje konkrete nga ana e saj. Kjo përgjigje duket se ka ardhur dje, ku fillimisht u tha se është plagosur gabimisht një person në fshatin Kordhocë, pranë Lazaratit, i cili po punonte në kopshtin e tij dhe më pas u tha zyrtarisht se ai është plagosur gjatë kundërshtimit të punonjësve të policisë nga persona të armatosur, të cilët dyshohet se janë kultivues dhe trafikantë droge.
Në lidhje me këtë ngjarje, u tha zyrtarisht se strukturat e Drejtorisë së Policisë Gjirokastër, dje kanë vijuar kontrollin e territorit për identifikimin e sipërfaqeve të kultivuara me bimë narkotike kanabis në këtë qark.
“Gjatë kohës që një grup i punonjësve të policisë po ushtronte kontroll në territorin e fshatit Lazarat, rreth orës 10:30, janë qëlluar me armë zjarri nga persona të paidentifikuar. Pas kësaj ngjarjeje, në Spitalin Rajonal Gjirokastër është paraqitur në urgjencë, i plagosur me armë zjarri, shtetasi Shpëtim Meçi, 45 vjeç. Strukturat e policisë kanë shkuar menjëherë në vendin e ngjarjes. Nga hetimet e kryera rezulton se ky shtetas ka qenë në oborrin e shtëpisë së tij, në lagjen Kordhocë, në Lazarat, në momentin e plagosjes dhe dyshohet që plagosja ka ndodhur gjatë kohës që është qëlluar me armë kundër forcave të policisë. Strukturat e Policisë së Qarkut Gjirokastër po punojnë për identifikimin dhe kapjen e autorëve të kësaj ngjarjeje, si dhe dokumentimin e plotë ligjor të saj. Materialet procedurale do t’i kalojnë për ndjekje të mëtejshme prokurorisë”, thuhet në deklaratën e Policisë së Shtetit.
Por, policia nuk ka dhënë asnjë detaj nëse forcat e saj janë tërhequr pas kësaj tentative për kontroll në fshat dhe nëse ka pasur shkëmbim zjarri me agresorët. Megjithatë, nga burime të besueshme policore mësohet se forcat në terren janë tërhequr në momentin e sulmit ndaj tyre dhe po planifikohet një ndërhyrje tjetër. Gjithashtu mësohet se ende nuk janë identifikuar personat që qëlluan ndaj forcave policore. Policia është sulmuar me armë të rënda sa herë ka tentuar të hyjë në këtë fshat, por kohët e fundit, zyrtarët e saj tentuan të bindin opinionin publik se situata në Lazarat ka ndryshuar dhe se ai ishte një territor i kontrolluar. /Gazeta Shqip/