Për çdo dy javë nga një vrasje!

0

Se edhe Kosova është kthyer në një vend me numër të madh të vrasjeve e tregojnë edhe statistikat e Policisë së Kosovës. Sipas statistikave të PK-së, në Kosovë gjatë gjashtëmujorit të parë të vitit 2014 kanë ndodhur 17 vrasje, e që i bie që për çdo dy javë në territorin e Kosovës të ketë ndodhur një vrasje.
Rajonet ku kanë ndodhur vrasjet më tepër, referuar të dhënave të PK-së, janë kryeqyteti i Kosovës, Prishtina dhe qyteti i Pejës.

Nga zyra për Informim e PK-së kanë theksuar se “në numrin më të madhe rasteve të vrasjeve, policia ka arrestuar personat e dyshuar dhe rastet kane përfunduar në prokuroritë kompetente”.

Në anën tjetër, Florian Qehaja nga Qendra Kosovare për Studime të Sigurisë (QKSS), ka thënë për Telegrafin se çështja e vrasjeve kategorizohet në radhët e krimeve të rënda, dhe sipas tij, ky problem vazhdon të sfidojë institucionet e sigurisë.

Ai ka theksuar se gjatë vitit 2000 në Kosovë kanë ndodhur deri në 300 vrasje kurse në vitin e kaluar (2013) kishim përafërsisht 50 vrasje, duke shtuar se kjo tregon që trendi i vrasjeve për vit është në rënie, gjë që duhet të nënvizohet.

“Njëkohësisht, nëse në gjashtëmujorin e parë kemi 17 vrasje, atëherë kemi rënie tutje të vrasjeve. Megjithatë, numri i tyre për kokë banori vazhdon të jetë në shifra të larta edhe në raport me rajonin (me përjashtim të Shqipërisë dhe Maqedonisë)”, ka thënë Qehaja për Telegrafin.

Sipas tij, çka është shqetësuese këtë vit, janë motivet e vrasjeve të cilat paksa dallojnë nga vitet e kaluara.

“Dhe në këtë drejtim kemi vend për shqetësim. Sidomos këtu e kam fjalën për rritjen e vrasjeve për motive ekonomike e biznesore gjë që ka implikime në krijimin e një ambienti të sigurt publik e biznesor në njërën anë si dhe në krijimin e klimës për investime të huaja, në anën tjetër”, ka thënë Qehaja.

Ai më tej ka shtuar se parandalimi është një metodë bashkëkohore që Policia e Kosovës vazhdon të jetë shumë pak e suksesshme, duke shtuar se kjo mund të bëhet nëpërmjet koncepteve të policimit në bashkësi si dhe policimit të udhëhequr nga inteligjenca.

“Policia duhet të krijojë mekanizma për marrjen e informacioneve, identifikimin dhe eliminimin e çdo tentative që ka për qëllim kryerjen e vrasjeve të rënda penale. Po ashtu, është më se e rëndësishme që të fuqizohet bashkëpunimi në trekëndëshin Polici-Prokurori-Gjyqësi për arsye se ka implikime në përfundimin e ciklit hetues dhe gjykues. Duke përfunduar rastet me ndëshkime kjo reflekton si një masë parandaluese e vetëdijesim për të gjithë ata persona të cilët kanë potencial apo synojnë kryerjen e veprave penale”, ka thënë Qehaja. /Telegrafi/ 

Share.

About Author

Leave A Reply

Visit Us On TwitterVisit Us On FacebookVisit Us On YoutubeCheck Our Feed
themekiller.com