Zona tampon, në varësi të vendimit të OKB-së

0

Zv/kryeministri dhe zëdhënësi i qeverisë turke, Bylent Arënç, deklaroi se praktika e zonës tampon është në varësi të vendimit, që do të dalë nga OKB-ja.

Qeveria e Turqisë realizoi të hënën mbledhjen javore nën drejtimin e Kryeministrit Ahmet Davutollu.
Në mbledhjen e Këshillit të Ministrave u dhanë informacione të detajuar në lidhje me operacionin e shpëtimit të personelit të Konsullatës së Përgjithshme të Turqisë në Mosul të Irakut.
Po ashtu, u shqyrtuan situata e refugjatëve sirianë të strehuar në Turqi për shkak të luftimeve në vendin e tyre, si dhe masat që do të merren në këtë drejtim.
Në një konferencë shtypi pas mbledhjes së Këshillit të Ministrave, zv/kryeministri dhe zëdhënësi i qeverisë turke, Bylent Arënç, iu përgjigj pyetjeve të gazetarëve rreth mënyrës sesi u shpëtuan pengjet turke në Mosul dhe nëse Turqia do të mbajë apo jo një qëndrim më të ashpër kundër ISID-it.
Arënç theksoi se Turqia do të bëjë patjetër detyrën e saj në lidhje me luftën kundër organizatave terroriste, pavarësisht sesi emërtohen ato. “Turqia do të veprojë, por këtë do ta bëjë në mënyrë të matur, duke menduar mirë fillim dhe fundin apo pasojat e saj. Do ta bëjë këtë gjë, por duke e ditur mirë se deri ku arrijnë dobitë dhe dëmet e saj për Turqinë”, tha ai.
Po ashtu, zv/kryeministri Arënç përgënjeshtroi pretendimet mbi shkëmbimet në operacionin e shpëtimit të pengjeve dhe shtoi se këtej e tutje përfaqësitë diplomatike turke në zonat e përleshjeve do të mbrohen nga “beretat bordo”, siç njihet forca speciale e komandove turke.
Një tjetër çështje e rëndësishme në agjendën e Këshillit të Ministrave të Turqisë ishte dhe vala e emigracionit nga Iraku Verior.
Zëdhënësi i Ankarasë zyrtare sqaroi se praktika e zonës tampon është në varësi të vendimit, që do të dalë nga Organizata e Kombeve të Bashkuara, duke nënvizuar se refugjatëve u lejohet hyrja në Turqi vetëm pas kontrolleve të domosdoshme. 

Share.

About Author

Leave A Reply

Visit Us On TwitterVisit Us On FacebookVisit Us On YoutubeCheck Our Feed
themekiller.com