Shumë burra u pritën e përcollën në këtë odë. Por, që nga vitet e ’80-ta të shekullit të kaluar, kulla e heroit Sulejman Vokshi në Gjakovë, nuk mund t’i bëjë konak askujt, për shkak të vjetërsisë.
Për këtë arsye dhe për shkak të gjendjes së rëndë materiale, pronari aktual ka vendosur që ta shesë.
“Shumë rrezik për dimër, se pikë shumë edhe kulmi është shkatërru tepër. Kushtet për jetë brenda janë shumë të këqija. Nëse mundet, le ta blejë Komuna e le ta bëjë pronë të veten”, thotë Naim Kalaveshi për Klan Kosova.
Pronar i ri i kullës mund të bëhet kushdo që ka mbi gjysmë milionë euro para të gatshme. Por, nxjerrja në shitje e këtij objekti historik nuk po pritet mirë në Gjakovë. Madje, Komuna po zotohet se nuk do të lejojë të ndodhë një gjë e tillë.
Drejtuesit e Komunës po premtojnë që këtij monumenti kulturor-historik do t’i bëhet zgjidhje, ndërsa do të merren vesh me pronarin për kompensimin e tokës.
Sulejman Vokshi – Lokaj (1815 – 1890) është veprimtar dhe figurë e shquar e Lidhjes së Prizrenit, si dhe Hero i Popullit në Kosovë. /Klan Kosova/
