Sipas Agjencisë së Statistikave të Kosovës (ASK), nga gjithsejtë 2.005,5 km rrugë në territorin e Kosovës, 94 për qind e tyre janë të asfaltuara. Nga to, 4 për qind janë rrugë ndërkombëtare, 31 për qind rrugë magjistrale dhe 65 për qind janë rrugë rajonale.
Në të dhënat e publikuara në “Statistikat e Transportit dhe Telekomunikacionit” për vitin 2013, thuhet se 120.1 km ose 6 për qind e rrugëve janë të pa asfaltuara.
Viti 2013 ka shënuar rritje të numrit të udhëtarëve që shfrytëzojnë transportin hekurudhorë për 5.29 për qind ose rreth 92 mijë, në 333 km binarë ku qarkullojnë 8 lokomotiva diel, të cilat bartin 27 vagonë, 9 të udhëtarëve dhe 18 për bagazh.
Por ulje për 14.36 për qind, ka shënuar transporti i mallrave me tren në raport me tremujorin e njëjtë të vitit 2012. Ulje në krahasim me tremujorin e njëjtë të vitit 2012, ka edhe në numrin e fluturimeve me 1.452 fluturime ose 13.47 për qind më pak.
Numri i udhëtarëve që ka shfrytëzuar aeroplanin si mjet transporti është rreth 313 mijë, dhe ka ulje për 7.60 për qind në krahasim me tremujorin e njëjtë të vitit 2012.