Dhuna fizike, psikologjike dhe seksuale vazhdon të mbetet shqetësuese në Rajonin e Pejës. Sidomos dhuna seksuale po shënon rritje dhe ajo ka filluar të prekë më shumë grupmoshat e vajzave të mitura. Ardita Bala, drejtoreshë në Qendrën për Mirëqenien e Gruas në Pejë, tha për gazetën Tribuna se nëse krahasohet me vitet e kaluara, viktima të dhunës seksuale janë gjithnjë e më shumë vajzat ndër moshën 18 vjeçe.
“Dhuna te mosha e grave krahasuar me të dhënat në të kaluarën, janë në rënie. Tash po rritet dhuna seksuale te moshat e reja ndër 18 vjeç”, tha Bala.
Vitin e kaluar siç tha ajo, në atë qendër kanë pasur 47 raste të vajzave të mitura si viktima të dhunës fizike, emocionale dhe asaj seksuale. “Kemi pasur edhe raste të incestit në familje. Kemi pasur edhe një rast të dhunës seksuale ndaj një vajze 12 vjeçare”, veçon Bala dy nga rastet më të ndjeshme të vitit të kaluar, derisa për këtë vit qendra ende nuk ka nxjerrë statistikat. Këto vepra të dhunës te moshat e mitura, sipas Balës, janë të pranishme si në zonat urbane e po ashtu edhe në zonat rurale./Tribuna/.