Eselamu alejkum hoxhë i nderuar!
Lus Allahun që të jeni shëndoshë e mirë ju dhe familja juaj.
Jam diplomuar si farmacist dhe tani jam në Gjermani në studime të doktoraturës në shkencat mjekësore.
Allahu ju shpërbleftë ju dhe hoxhallarët e tjerë që jeni mjaft aktivë dhe po na mundësoni përfitime të shumta, sidomos për mua që jam jashtë vendit, ku shumicën e kohës ligjëratat që ndjek online përmes QSI-së janë e vetmja mënyrë për ta mbajtur të fortë imanin.
Hoxhë, kam nevojë për ndihmën tuaj lidhur me një çështje. Shpresoj që në emër të Allahut do të mund të gjeni pak kohë të më ndihmoni.
Në kuadër të punës së doktoraturës përfshihet edhe puna me kafshë laboratorike, përkatësisht me minj. Unë kam pyetur në lidhje me çështjen paraprakisht dhe jam munduar të lexoj edhe në internet, por megjithatë po frikësohem se nga dëshira për ta parë çështjen si të lejuar (kjo ka qenë përgjigjja që kam marrë), nuk e kam shqyrtuar sa duhet çështjen në detaje. E di që është çështje delikate dhe se përgjigjja është e vështire, sidomos meqë nuk e dini saktësisht se çka po nënkuptoj me “punë me kafshë”. Do t’ju isha falënderues nëse do të mund të më sugjeroni ndonjë literaturë ose ndonjë dijetar prej të cilit do të mund të lexoja më shumë në lidhje me këtë çështje.
Edhe nëse është e lejuar në parim, do të doja të dija më shumë detaje dhe të dija për limitet që duhet pasur kujdes.
Lus Allahu të na japë udhëzim të drejtë dhe të na ndihmojë të dallojmë çështjen e hajrit prej çështjeve nga të cilat duhet të distancohemi!
Ju falënderoj paraprakisht.
Përgjigjja:
Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit!
Alejkum selam ve rahmetullahi ve berekatuh!
Allahu të shpërbleftë dhe e lus Atë që të na forcojë në rrugën e Tij..
Me “punë me kafshë” po kuptoj se keni për qëllim me kafshët të cilat përdoren për eksperimente në laboratorë për qëllime të zgjerimit të njohurive rreth sëmundjeve të ndryshme, gjetjen e ndonjë ilaçi, etj.
Ndërsa për këtë temë kanë folur dijetarët bashkëkohorë dhe me aq njohuri sa kemi ne, e dimë se është e lejuar, madje edhe me kafshët që përmendni ju, sikurse minjtë apo edhe derrat. Ky mendim është shumë i njohur dhe i trajtuar.
Unë e kam parasysh kompleksivitetin dhe qasjen që dëshironi ta bëni në studimin tuaj, por fatkeqësisht në gjuhën shqipe nuk di se ka ndonjë libër që bën shtjellimin e kësaj problematike nga aspekti islam, kurse në gjuhën angleze ndoshta ka, prandaj hulumtoni përmes internetit apo ndonjë forme tjetër, por mund të supozoj se nuk do të gjeni ndonjë shkrim që e shtjellon çështjen shtruar.
Kurse të shkruajmë ne tani fatkeqësisht nuk do të mundemi, por ajo çfarë mund të bëjmë është që nëse keni ndonjë pyetje konkrete apo sqarim që ta kuptoni çështjen më mirë, atëherë na shkruani dhe do të mundohemi t’ju përgjigjemi. Selam alejkum!
Hoxhë Alaudin Abazi
1 Comment
Nje tem mjaft interesante dhe mos te kete akoma literature ne gjuhen shqipe eshte mjaft zhgenjyese. Por ne anen tjeter edhe nje sinjal per te gjithe ne qe te perkujdesemi qe ta pasurojme literaturen tone me perkthimet qe mund te i bejme nga literatura burimore. Do e shfrytezij ratinqe te jap nje kontribut ne pergjigjen e hoxhes per kete teme.
Çeshtja edhe pse eshte e lejuar eshte e ndjeshme andaj duhet pasur parasysh disa kushte gjate eksperimentimeve :
1. Hulumtimi i literatures: Para se te fillohet me eksperimentin te hulumtohet mjaftueshem literatura per eksperimente te ngjajshme dhe metodologjia qe eshte aplikuar.
2. Zevendesimi: nese ka mundesi qe rezultatet me besueshmeri te ngjajshme shkencore te perfitohen nga ndonje produkt/material tjeter te perodret materiali tjeter.
3. Mostra optimale: duhet te behen matja statistikore e mostres dhe te merret mostra optimale qe nuk do e ndikoj rrezultatin perfundimtar.
4.Sigurimi i kushteve te pershtatshme: Gjate eksperimentit te perdoret metoda qe i shkakton shqetesime minimale kafshes.
5. Eksperimeti nuk duhet te behet per qejf dhe defrim, duhet te kete per qellim ofrimin e ndonje miresie ne jeten e njeriut.
Shenim: Duhet te u permbahet normave etike dhe cerfikimeve(esperimentuesi te jete i licensuar per metoden qe do perdoret) perkateseeksperimentimit.