Ndonëse ishte festuar vendimi me të cilin Fatmir Limaj e shokët e tij të luftës vitin e kaluar janë shpallur të pafajshëm nga Gjykata, akoma nuk ka përfunduar e tëra. Fatmir Limaj, Arben Krasniqi, Naser Krasniqi, Nexhmi Krasniqi, Behlul Limaj, Refki Mazreku, Naser Shala, Sabit Shala, Shaban Shala e Besim Shurdhaj janë ftuar që më 9 korrik të paraqiten në Gjykatën e Apelit, e cila do të vendosë lidhur me ankesën e prokurorit të rastit, Maurizio Salustro, i cili nuk ishte pajtuar me shpalljen të pafajshëm dhe kishte kërkuar ndryshimin e tërësishëm të vendimit të shkallës së parë apo kthimin e lëndës në rigjykim.
Zëdhënësja e misionit EULEX, Dragana Nikoliq Solomon, ka thënë për “Zërin” se seanca në Gjykatën e Apelit është caktuar të mbahet më datën 9 korrik dhe se të gjitha palëve në procedurë tashmë u janë dorëzuar ftesat.
Sipas ftesës së dërguar nga gjyqtari i rastit, Manuel Soares, një kopje të së cilës e posedon gazeta, në seancën e 9 korrikut do të vendoset mbi ankesën e Prokurorisë kundër aktgjykimit të Gjykatës Themelore që mban numrin P nr. 766/12.
Ankesa që do të shqyrtohet gjatë kësaj seance është përpiluar nga prokurori special, Maurizio Salustro, i cili edhe i ka drejtuar hetimet në shumë raste ku është pretenduar se janë kryer krime lufte dhe në këtë mes edhe hetimet në rastin e njohur si “Kleçka”.