Disa shtetas italianë janë kapur duke tentuar të kalojnë sasi të konsiderueshme droge në pikat kufitare. Ironia e rasteve të identifikuara, është se në pjesën më të madhe, korrierët italianë, kanë qenë të moshës së vjetër, kryesisht pensionistë.
I tillë është rasti i Angelo Banano, pensionistit 61-vjeçar që u kap katër ditë më parë në pikën kufitare të Muriqanit, ndërkohë ky rast është në vijim të një rasti tjetër ku sërish në këtë pikë kufitare, është tentuar të trafikohet nga një i moshuar tjetër italian sasia prej 100 kg lëndë narkotike.
Angelo Banano kishte udhëtuar në drejtim të Shqipërisë nga Sicilia, ku pasi ka qëndruar disa ditë në vendin tonë ka vendosur të largohet nga pika kufitare e Muriqanit në Shkodër.
I moshuari teksa i është afruar doganës, makina e tij është veçuar nga rreshti, duke iu nënshtruar një kontrolli fizik të rreptë.
Gjatë kontrollit në automjetin e tij, është gjetur dhe sekuestruar një sasi prej 10 kilogramwsh, lëndë narkotike e llojit marijuanë, citon “shqiptarja.com”.
Në muajin nëntor të vitit 2013 një tjetër italian është kthyer në korrier droge në shërbim të një grupi kriminal që vepron në Shkodër.
Italiani Augosto Priori, kishte mbërritur në Shqipëri me të dashurën e tij shqiptare dhe pasi kishin fjetur në një hotel luksoz në Shkodër, janë ngritur në mëngjes dhe kanë udhëtuar me automjetin e tyre, në drejtim të pikës kufitare Hani i Hotit.
Rreth orës 12:30 policia kufitare ka evidentuar 100 kg kanabis sativa në një automjet tip “Rulot” në doganën e Hanit të Hotit, ndërsa tentonte të kalonte në Malin e Zi.
Pas verifikimit dhe hetimeve paraprake, autoritetet i kanë vënë prangat drejtuesit të mjetit. /Shekulli/