Panairi “Blej Shqip” në Prishtinë

0

Në Prishtinë, ka filluar panairi dyditor me sloganin “Blej Shqip”. Me organizmin e këtij panairi po shënohet festa e 28 nëntorit, Ditës së Flamurit dhe Pavarësisë së Shqipërisë.

Panairi është organizuar në bashkëpunim të Komunës së Prishtinës dhe Ministrisë për Zhvillim Ekonomik Tregti dhe Sipërmarrjes të Qeverisë së Shqipërisë. Në këtë panair do të ekspozohen produktet e 50 kompanive nga Shqipëria, 50 nga Kosova dhe 13 nga Maqedonia.

Ambasadori i Shqipërisë në Kosovë, Qemal Minxhozi dhe drejtori i Drejtorisë për Zhvillim Ekonomik i Komunës së Prishtinës, Genc Bashota, kanë vizituar stendat e vendosura përgjatë tërë shëtitores në qendër të Prishtinës.

Me këtë rast, Genc Bashota ka njoftuar se nesër, më 28 nëntor, panairin do ta hap zyrtarisht kryetari i komunës së Prishtinës, Shpend Ahmeti së bashku me ministrin e Ministrisë për Zhvillim Ekonomik, Tregti dhe Sipërmarrje të Qeverisë së Shqipërisë, Arben Ahmetaj.

“Ideja dhe qëllimi i këtij organizimi me rastin e Festës së Flamurit është që pak a shumë kompanitë shqiptare dhe kosovare, por edhe ato të Maqedonisë ku janë shqiptarët, të gjejnë një vend ku mund të shkëmbejnë përvojat e tyre, e në anën tjetër edhe konsumatorët të njihen me prodhimet vendore. Përndryshe, e veçanta e panairit është që të gjithë kompanitë janë kryekëput vendore – të Shqipërisë, të Kosovës dhe të Maqedonisë” ka thënë Bashota

Ambasadori i Shqipërisë në Kosovë, Qemal Minxhozi tha se, kremtimi i Ditës së Flamurit ka filluar por, jo me këngë e valle por me produkte shqiptare.

“Blej Shqip do të jetë sot e nesër kryefjala e këtij aktiviteti të madh që për herë të parë e bëjnë së bashku 113 kompani shqiptare, që do të thotë se është një promovim shumë i madh i vlerave ekonomike që bart rajoni. Ne mendojmë që me këtë do të jepet edhe një zgjidhje më e madhe iniciativave të ndryshme në gjithë hapësirën shqiptare që të shikohet mundësia që të prodhojmë shqip, të blejmë shqip dhe të shkëmbejmë shqip” deklaroi ambasadori Minxhozi dhe shtoi se, ky panair do të nxis bashkëpunimin dhe iniciativat e reja në gjitha hapësirat ku jetojnë shqiptarët për të shqyrtuar mundësit e prodhimit, blerjes dhe këmbimit të produkteve shqiptare.

Ai po ashtu ka shprehur shpresën se kjo iniciativë nga viti i ardhshëm do të bëhet e përditshme dhe se prodhimtaria shqiptare do të dyfishohet.

Në kuadër të panairit “Blej Shqip” për ditën e nesërme është paraparë edhe mbajtja e tryezës së rrumbullakët me prodhuesit shqiptarë, në të cilën do të marrin pjesë edhe kryetari i Prishtinës, Shpend Ahmeti dhe ministri i Zhvillimit Ekonomik Tregtisë dhe Sipërmarrjes së Shqipërisë, Arben Ahmetaj. 

Share.

About Author

Leave A Reply

Visit Us On TwitterVisit Us On FacebookVisit Us On YoutubeCheck Our Feed
themekiller.com