Partia Demokratike ka nisur sot në orën 11:00 Kuvendin Kombëtar, ku do të votohet për Këshillin Kombëtar dhe Statutin e ri të partisë.
Kreu i kësaj force politike, Lulzim Basha në fjalën e tij ka folur për humbjen e zgjedhjeve të fundit parlamentare duke thënë se ajo erdhi kryesisht për shkak të krizës ekonomike globale dhe mungesës së dialogut me qytetarin.
“Manipulimi i zgjedhësve, shitblerja e votës dhe efektet e krizës globale ndikuan padyshim në rezultatin zgjedhor, por rezultati do të ishte tjetër nëse ne do të ishim treguar më të vendosur, më të bashkuar dhe më të përkushtuar në betejën elektorale. Ne nuk shfrytëzuam potencialin tonë real”, tha kreu i opozitës.
Basha pasi kërkoi falje për humbjen e zgjedhjeve u shpreh se, PD do të dijë të ngrihet dhe mori si shembull rikthimin në pushtet pas qëndrimit 8 vjet në opozitë pas humbjes së zgjedhjeve parlamentare në vitin 1997.
“Unë ju kërkoj ndjesë nga kjo tribunë me përulje anëtarëve të PD dhe para së gjithash qytetarëve shqiptarë që mund të jenë ndjerë të braktisur, dhe ju deklaroj angazhimin për korrigjim në dritën e analizave që kemi zhvilluar të mangësive dhe gabimeve tona”, u shpreh Basha.
“Kemi përvojë unike të ringritjes. Ne u ngritëm nga prushi dhe hiri pas daljes së parë në opozitë në vitin 1997. Ajo është një përvojë shumë e vyer, jo vetëm për demokratët e çdo gjenerate, por dhe për politikën në përgjithësi. Qëndresa epike e partisë tonë në 4-vjeçarin e parë dhe hapja në 4-vjeçarin e dytë në opozitë është një leksion qëndrese, e gjetjes së vlerave më të mira dhe rikthimi në pushtet.”
Nga ana tjetër, Basha foli edhe për drejtimin e PD-së, duke nënvizuar se “hierarkia në PD as jepet dhe as trashëgohet”.