Agjencia e të Dhënave Personale ka konstatuar se partitë politike dhe operatorët telefonikë kanë kryer abuzim të dyfishtë, kur kanë përdorur të dhënat e klientëve për nevoja të zgjedhjeve. Këto raste, varësisht nga shkalla e shkeljeve, është paralajmëruar t’i dërgohen gjykatës.
Përmasat e shkeljeve ligjore të partive politike para dhe gjatë ditës së zgjedhjeve janë shtrirë edhe tek cenimi i privatësisë së e qytetarëve.
Por, kjo sipas Agjencisë për Mbrojtjen e të Dhënave Personale ka dalë të jetë një ndërmarrje e përbashkët abuzuese me operatorët e telefonisë mobile në vend.
Agjencia e të Dhënave Personale ka konfirmuar se tri partitë kryesore politike Partia Demokratike e Kosovës,Lidhja Demokratike e Kosovës dhe Lëvizja Vetëvendosje kishin lidhur paraprakisht kontrata me operatorët telefonisë mobile për të dërguar mesazhe gjatë periudhës zgjedhore.
Ligjshmëria e këtyre kontratave, shfrytëzimi i të dhënave të klientëve nga subjektet dhe kandidatët e tyre dhe cenimi i privatësisë përmes marketingut të padëshiruar janë duke u shqyrtuar tashmë nga Agjencia për Mbrojtjen e të Dhënave Personale, por edhe Autoriteti Rregullativ i Komunikimeve Elektronike dhe Postare (ARKEP).
Mentor Hoxha, mbikëqyrës i shtetit në Agjencinë e Mbrojtjes së të Dhënave Personale, ka thënë se shkeljet kanë ndodhur, por mbetet të shihen në çfarë niveli.
“Këto raste do të dërgohen në gjykatë. Nëse vërtetohet se ndonjë nga operatorët vërtetohet se i ka dhënë të dhënat personale një personi të tretë këtu kemi të bëjmë me raste të shkeljeve penale. Abuzimi ka ndodhur por duhet të shohim në çfarë niveli dhe ju garantoj. Secili do të përballet me ligjin”, ka thënë Hoxha.
Jo krejt i përfshirë me detyrat që i jep ligji karshi shkeljeve të operatorëve të telefonisë mobile është shfaqur Autoriteti Rregullativ i Komunikimeve Elektronike dhe Postare (ARKEP).
Kreu i këtij autoriteti, Ekrem Hoxha, ka thënë se me gjithë ato që përkufizon ligji ky autoritet nuk ka marr ankesa rreth shkeljeve.
“Pavarësisht a saj që përkufizon ligji e them me përgjegjësi të plotë dhe zyrtarisht që ne si ARKEP nuk kemi pasur asnjë ankesë sa i përket kësaj natyre”, ka thënë Hoxha.
Disa nga kandidatët dhe subjektet politike që kanë dërguar këto mesazhe nuk kanë arritur të fitojnë. Megjithatë me shkeljen që kanë bërë e ta do të vazhdojnë të merren edhe më tej organet përgjegjëse.
Mesazhet telefonike të dërguara gjatë periudhës së heshtjes zgjedhore dhe ditës së zgjedhjeve janë kualifikuar si shkelje edhe nga Paneli Zgjedhor për Ankesa dhe Parashtresa.
Ky Panel, sipas Mul Deskut. ka shqiptuar gjoba me mijëra euro për partitë dhe kandidatët që kanë dërguar ato. /rtk