Zhurma dhe mosmarrëveshja për një rrugë, solli përleshjen e katër personave. Sot, rreth orës 10:00, në rrugën “Mentor Krasniqi”, tre vëllezër me mbiemrin Kabashi kanë sulmuar fqinjin e tyre.
Siç njofton Policia rajonale në Prizren, nga ky incident ishin dëgjuar edhe shkrepje me armë, por nuk ka të plagosur.
Ai që kishte shkrepur me armë thuhet të ketë qenë vëllai i viktimës, me mbiemrin Gashi.
“Gjatë sulmit ishte krijuar një potere të cilën e kishte dëgjuar vëllai i viktimës i cili, pasi ka parë ngjarjen, është kthyer në shtëpi dhe ka marrë një pistoletë të llojit ‘Ekol Special 99’ me të cilën ka shkrehur disa herë. Ende nuk dihet saktësisht se në ç’drejtim ka shtënë i dyshuari, ndërsa sipas informatave që i posedon policia, nuk ka të plagosur me armë zjarri”, thuhet në njoftimin e Policisë.
Gjatë kontrollit, Policia njofton se ka sekuestruar armën dhe ka gjetur tri gëzhoja, e po ashtu është sekuestruar edhe një pushkë gjuetie me leje të skaduar dhe 32 fishekë të gjuetisë.
Katër të dyshuarit të përfshirë në këtë incident, janë dërguar në mbajtje. /Telegrafi/