Prangoset “Mesia” i Elbasanit, mashtronte vajzat e reja

0

Arrestohet një person, i cili akuzohet për nxitje të urrejtjes dhe grindjeve për shkak të racës dhe etnisë. Dje, policia e Elbasanit ka bërë të mundur prangosjen e Ilirian Hidës, 39 vjeç. Pas hetimeve të Prokurorisë së Elbasanit, gjykata vendosi masën “arrest me burg”, për Hidën, nën akuzën e “nxitjes së urrejtjes dhe e grindjeve, për shkak të racës, etnisë, fesë”, masë e cila është ekzekutuar nga ana e Policisë së Shtetit.
Duket se gjithçka ka nisur me predikimet radikale që përdorte shtetasi në fjalë. 39-vjeçari, i punësuar si xhamalarës, predikon sektin fetar “Kisha e Lirë e Apostujve të Pentagonis”, një sekt i panjohur nga autoritetet përgjegjëse. Sipas informacioneve që ka publikuar Prokuroria e Elbasanit, sektin e 39-vjeçarit e ndjekin vajza në moshë të re, të cilave u predikon shkëputjen nga shoqëria dhe familja dhe faktin se kush nuk ndjek zotin në mënyrë të drejtpërdrejtë janë “djaj”. Të njëjtin qëndrim predikon edhe për kishat, duke i konsideruar si “njerëz të djallit”.

Shtetasi B.F ka kallëzuar se vajza e tij, e cila vazhdon shkollën e lartë në Tirane, ka disa kohë që frekuenton një sekt fetar të krishterë me predikues Ilirian Hidën nga qyteti i Elbasanit, i cili predikimet e tij i zhvillon në ambientet e banesës së tij. Sipas bisedave që kallëzuesi ka bërë me vajzën e tij, predikuesi i mësonte atyre që të tërhiqeshin nga familja dhe mos t`i respektonin prindërit. Sipas Prokurorisë, predikuesi i instruktonte vajzat që të ndaheshin nga shoqëria ku bënin pjesë dhe të kishin kontakte vetëm me persona që ishin pjesëtarë të këtij grupi predikues.

Predikimet 39-vjeçari i bënte me anë të telefonit 2 orë në mëngjes dhe 2 orë në darkë, ndërsa ditën e diel vajzat duhet të vinin në Elbasan tek banesa e tij. Ndërkohë, një tjetër kallëzim penal është depozituar në polici në lidhje me këtë shtetas. Kallëzuesi Q. A, ka deklaruar se disa vite më parë vajza e tij ka filluar të frekuentojë “Kishën e lirë të Apostujve të Pentagosis” në Tiranë, transmeton Shekulli.

Vajza ka rreth 3 vjet që ka mbaruar shkollën e lartë, por nuk pranon që të punësohet pasi sipas saj zoti nuk e lë të punojë. Kallëzuesi Q. A ka folur ne telefon me Ilirian Hidën duke i kërkuar që të largohej nga jeta e vajzave të tij dhe të mos ndikonte për keq. Hida i është përgjigjur që ajo ishte motra e tij dhe se ata ishin në luftë me gjithë botën.

“Si rezultat i predikimeve dhe ndikimit të shtetasit Ilirian Hida, vajza është rënduar nga ana psikologjike, duke preferuar të rri e vetmuar dhe e shkëputur nga shoqëria e saj.”- thuhet në deklaratën e Prokurorisë së Elbasanit. Për 39-vjeçarin nga Elbasani ka pasur dhe një tjetër kallëzim nga shtetasi H. Sh. Sipas këtij shtetasi, vajza e tij bën pjesë në grupin e parë të Ilirian Hidës dhe pas mbarimit të shkollës së lartë, filloi të shfaqte shqetësime serioze pasi sipas saj ishte prishur kisha ku ajo shkonte për të predikuar, dhe tashmë zoti kishte sjell një njeri të tijin të vërtetë që ishte Ilirian Hida. Vajza, sipas dëshmisë së familjarit, ka shfaqur probleme mendore dhe fizike. 

Share.

About Author

Leave A Reply

Visit Us On TwitterVisit Us On FacebookVisit Us On YoutubeCheck Our Feed
themekiller.com