Vendimet e së mërkurës të Qeverisë në detyrë, nëpërmes së cilave u ka vazhduar edhe një mandat trevjeçar sekretarëve të përgjithshëm dhe që ndau gjysmë milioni euro për televizionin publik, përveç që po konsiderohen të kundërligjshme, shihen edhe si provokim për situatën në të cilën po kalon Kosova.
Kështu vlerësojnë analistë në vend, të cilët thonë se kjo Qeveri po mundohet të inskenojë normalitet në një situatë jonormale, siç është njëherë për njëherë në Kosovë.
Fidan Kalaja nga lëvizja “FOL” ka thënë se Qeveria do të duhej t’u ikte vendimeve sensitive, e të fokusohej vetëm në vendime që garantojnë funksionalitetin e vendit.
Ai ka kritikuar ashpër edhe vendimin për ndarjen e 500 mijë eurove për RTK-në, duke thënë se kjo është në kundërshtim edhe me vetë Ligjin për mediumin publik. Me këto mjete që Qeveria ia ndau RTK-së i është cenuar integriteti dhe pavarësia e këtij mediumi, vlerëson Kalaja.
Të kundërligjshëm vendimin për mbështetje financiare për RTK-në e vlerëson edhe Visar Rushiti, analist politikash në institutin GAP. Ai thotë se ky vendim mund ta shndërrojë RTK-në në një institucion të varur ndaj Qeverisë.
Qeveria e Kosovës të mërkurën vendosi që t’u vazhdojë edhe për 3 vjet mandatin sekretarëve të përgjithshëm dhe pozitat e barasvlershme, të cilave tanimë u ka kaluar afatet. /KTV/