Taiwani ka raportuar rastin e parë të konfirmuar me ethet chikungunya, i importuar nga Kina, ku aktualisht po zhvillohet një shpërthim historik i këtij virusi të transmetuar nga mushkonjat.
Në javët e fundit, chikungunya është përhapur me shpejtësi në jug të Kinës, kryesisht në qytetin industrial Foshan në deltën e lumit Pearl, me mbi 8,000 raste të raportuara. Ky është shpërthimi më i madh i regjistruar ndonjëherë, sipas Roger Hewson, përgjegjës për monitorimin e viruseve në Institutin “Wellcome Sanger” në Mbretërinë e Bashkuar.
Qendrat për Kontrollin e Sëmundjeve në Tajvan (CDC) njoftuan se virusi u zbulua tek një grua tajvaneze që kishte udhëtuar në Foshan dhe ishte kthyer më 30 korrik. Ky është rasti i parë i tillë i zbuluar këtë vit, megjithëse më parë janë regjistruar mbi një duzinë rastesh të importuara nga Indonezia, Filipinet dhe Sri Lanka.
CDC-ja ka ngritur nivelin e këshillës për udhëtime drejt provincës Guangdong – epiqendra e shpërthimit – në nivelin 2 nga 3, duke u bërë thirrje udhëtarëve të marrin “masa të shtuara paraprake”.
Virusi mund të shkaktojë temperaturë të lartë, skuqje në lëkurë, dhimbje koke, të përziera dhe lodhje që zgjasin deri në një javë, si dhe dhimbje muskulore e të kyçeve që mund të vazhdojnë për disa javë.
Sipas Hewson, përhapja e shpejtë lidhet me mungesën e imunitetit në popullatë dhe kushtet e favorshme mjedisore për mushkonjat bartëse të virusit Aedes aegypti dhe Aedes albopictus, të cilat shumohen në ujëra të ndenjura.
Autoritetet shëndetësore kineze kanë ndërmarrë masa të ndryshme për kontrollin e situatës, nga inspektimet shtëpi më shtëpi dhe përdorimi i rrjetave mbrojtëse, deri tek spërkatjet me drone dhe karantinimet, të ngjashme me ato të pandemisë së COVID-19. Banorët në Foshan mund të gjobiten deri në 10,000 RMB (rreth 1,400 dollarë) nëse mbajnë ujë në enë të hapura jashtë, pasi këto krijojnë terren të përshtatshëm për shumimin e mushkonjave.
Shpërthimi vjen pas më shumë se një muaji tajfunesh dhe reshjeve të dendura të stinës së shirave në Kinë.
Megjithëse numri i rasteve është historik, mediat shtetërore kineze raportojnë se situata duket të ketë arritur kulmin. Nga 27 korriku deri më 2 gusht, Foshan raportoi 2,892 infeksione vendore, por asnjë rast të rëndë apo fatal. Sipas autoriteteve, ka filluar një ulje graduale e rasteve të reja në të gjithë provincën.
