Kombëtarja e Portugalisë është shpallur kampione e Ligës së Kombeve, pasi triumfoi ndaj Spanjës pas një finale dramatike që u vendos nga penalltitë.
Ndeshja nisi me ritëm të lartë. Joao Neves pati rastin e parë serioz në minutën e 5-të, por goditja e tij përfundoi jashtë portës së Unai Simon.
Në minutën e 17-të, Nico Williams pati një mundësi të artë për Spanjën, por gjuajtja e tij përfundoi mbi traversë.
Spanja kaloi në epërsi në minutën e 21-të me anë të Martin Zubimendit, i cili u gjend në vendin e duhur për të shtyrë topin në rrjetë.
Reagimi i portugezëve erdhi vetëm pesë minuta më pas. Nuno Mendes realizoi një gol të bukur në minutën e 26-të për të barazuar rezultatin në 1-1.
Por pak sekonda para mbylljes së pjesës së parë, Mikel Oyarzabal riktheu avantazhin për Spanjën në minutën e 45-të pas një asisti nga Pedri, duke e çuar rezultatin në 2-1.
Në pjesën e dytë, Cristiano Ronaldo barazoi gjithçka në minutën e 61-të, duke e çuar rezultatin në 2-2 dhe duke rikthyer emocionet në “finalen e madhe”.
Pas këtij goli, ndeshja vazhdoi me një ritëm të lartë, por pa gola të tjerë, çka çoi në dy periudha shtesë nga 15 minuta.
Edhe pas vazhdimeve nuk u arrit të përcaktohej një fitues, dhe gjithçka u vendos nga penalltitë.
Në ekzekutimet nga pika e bardhë, Portugalia ishte më e saktë, duke fituar me rezultat 5-3, ndërsa për Spanjën dështoi të shënojë Alvaro Morata.
Me këtë fitore, Portugalia siguron një tjetër trofe prestigjioz në arenën ndërkombëtare, në një ndeshje që solli emocion, spektakël dhe fund dramatik.
