Dronë me origjinë të panjohur kanë shkaktuar sërish incidente në Belgjikë, pasi janë parë duke fluturuar mbi një aeroport dhe një central bërthamor. Pas Gjermanisë, tani edhe Mbretëria e Bashkuar po ofron ndihmë për Belgjikën që të mbrohet nga këta dronë.
Të dielën në mbrëmje, dronë u vunë re përsëri mbi infrastrukturën kritike në Belgjikë. Aeroporti i Liège-it u detyrua të pezullonte operimet pasi u pikasën disa dronë. Gjithashtu, drona janë vërejtur edhe mbi një termocentral bërthamor pranë Antwerpit.
Trafiku ajror në aeroportin e Liège-it, i cili është një nga aeroportet më të mëdha të mallrave në Evropë, u ndalua për gati një orë. Ky problem ka shkaktuar ndërprerje të ngjashme të trafikut ditët e fundit si në Liège ashtu edhe në aeroportin e Brukselit.
Tre dronë mbi termocentralin bërthamor
Tre dronë u vunë re gjithashtu mbi termocentralin bërthamor Doel, afër Antwerpit. Një zëdhënës i termocentralit konfirmoi se nuk pati pezullim të punës, por theksoi se ata janë të sensibilizuar me situatën.
Duke marrë parasysh numrin e madh të dronëve të parë kohët e fundit, Ministria Gjermane e Mbrojtjes njoftoi javën e kaluar se Bundeswehri (ushtria gjermane) po ndihmon Belgjikën në mbrojtjen kundër dronëve, pas një kërkese nga pala belge.
Londra dërgon personel për të luftuar dronët
Mbretëria e Bashkuar gjithashtu i është përgjigjur kërkesës për ndihmë. Një zëdhënës ushtarak britanik tha se Londra po dërgon pajisje dhe personel për të luftuar dronët. Sekretari i Mbrojtjes, John Healey, deklaroi se do ta mbështeste partnerin e NATO-s.
Ai shpjegoi se, duke pasur parasysh kërcënimet hibride në rritje, bëhet fjalë për mbrojtje të përbashkët dhe mbrojtje të infrastrukturës kritike dhe hapësirës ajrore.
Kohët e fundit, dronët janë parë disa herë në Belgjikë, përfshirë edhe në bazën ushtarake Kleine-Brogel, e cila përdoret nga NATO. Sipas raporteve të pakonfirmuara, kjo bazë ajrore është një nga vendet në Evropë ku mendohet se ruhen armë bërthamore amerikane.
Belgjika është gjithashtu vendi ku ndodhen selitë e NATO-s dhe të Bashkimit Evropian. Përveç kësaj, kompania financiare belge Euroclear mban një pjesë të madhe të aseteve ruse që Perëndimi i ka ngrirë pas pushtimit të Ukrainës. Shumë vende të BE-së synojnë të përdorin pjesë të këtyre aseteve si kredi për Ukrainën, gjë që autoritetet belge deri më tani e kanë kundërshtuar.
