Shumë delikate, shumë të kujdesshme
Fundet e gjata dhe stilet e gjera të veshjes kënaqin ndjekësit dhe stilistët e modës
Kurban Bajrami, i cili këtë vit ishte me 6 qershor, quhet me arsye një gala ngjarje muslimane. Festa islame tre-ditore është një mundësi jo vetëm për respektim fetar, por edhe për kompanitë e modës, pasi muslimanet vishen me elegancë maksimale. Ndërsa shpenzimet e muslimanëve për modë po rriten, stilistët po nxjerrin koleksione të destinuara për besimtarët. Për më tepër, edhe jo-myslimanët po adoptojnë trendin e “veshjes modeste”.
Tregu kryesor i modës modeste janë rreth një miliard gra myslimane në botë, shumë prej të cilave vishen në mënyrë konservative. Shpenzimet e konsumatorëve muslimanë për modë do të arrijnë në 428 miliardë dollarë deri në vitin 2027, një rritje prej më shumë se një të tretën që nga viti 2022, parashikon DinarStandard, një firmë kërkimore. Kërkimet në internet për veshje modeste janë më të lartat në periudhën para sezonit të dasmave verore dhe festave fetare si Bajramet. Në muajin e fundit, veshjet modeste kanë qenë një nga pesë kategoritë më të njohura të modës në versionin britanik të TikTok Shop, një platformë e tregtisë sociale.
Duke vënë re kërkesën në rritje, markat perëndimore po synojnë veshjet modeste. ASOS, një shitës me pakicë britanik i modës së shpejtë, ka një seksion për veshje modeste në faqen e tij me artikuj që ofrojnë mbulim më të plotë. Nike, e cila prezantoi një veshje sportive “pro hijab” në vitin 2017, ka zbuluar që atëherë një linjë veshjesh modeste për notin (hixhabi kushton 38 dollarë dhe kostumet e notit 130 dollarë – jo aq modest për portofolin).
Shtëpitë e stilistëve, duke përfshirë Alexander McQueen, LVMH dhe Versace, kanë nxjerrë koleksione për Ramazan dhe Bajram në vitet e fundit.
Muslimanët nuk janë të vetmit që shpenzojnë për modën konservatore. Ndërthurja e veshjeve modeste me tendencat aktuale e ka shtyrë atë më tej në qendër të vëmendjes. Mediat sociale janë të mbushura me pamje të tilla si “minimalizmi skandinav”, “paraja e vjetër” dhe “luksi i qetë”, të cilat paraqesin rroba të gjera, mëngë të gjata, qafë të larta dhe funde të gjata. Pinterest, një platformë sociale, ka parë që kërkimet për “moda e fustaneve modeste” dhe “ide veshjesh të gjera” të rriten më shumë se katërfish në vitin e kaluar. Në TikTok hashtag-u #modestfashion ka mbi 12 miliardë shikime.
Trendet vijnë dhe shkojnë: xhinset e ngushta dhe pantallonat e shkurtra duket se po ikini për një kohë. Por shpenzimet për veshje nga muslimanët do të rriten gjithsesi. DinarStandard parashikon rritje të vazhdueshme prej 6% në vit. Ndërsa tregjet myslimane rriten, biznesi i veshjeve modeste nuk do të dalë nga moda së shpejti. ■
The Economist
