Protesta e punëtorëve të ndërmarrjes publike “Trafiku Urban” ka shkaktuar bllokimin e disa rrugëve kryesore në kryeqytetin e Kosovës, duke rënduar ndjeshëm qarkullimin në Prishtinë. Punëtorët, të cilët prej së hënës kanë ndërprerë të gjitha shërbimet e transportit publik për shkak të mosmarrjes së pagave, kanë bllokuar të martën dhe të mërkurën për dy orë rrugët përreth objektit të Komunës së Prishtinës.
Autobusët, që zakonisht bartnin qytetarët, këtë herë u rreshtuan në rrugët nga Teatri Kombëtar deri te rrethrrotullimi prapa Komunës, si dhe në rrugën “UÇK”, duke pamundësuar qarkullimin normal të automjeteve. Shumë qytetarë janë detyruar të shmangin këto zona nga ora 11:00 deri në 13:00, kur zhvillohet protesta.
Përfaqësuesi i punëtorëve, Ilmi Gashi, deklaroi se protesta synon vetëm marrjen e pagave të tyre, të cilat i quajti “të drejtë elementare”. Ai theksoi se punëtorët shpresojnë që mbledhja e jashtëzakonshme e Kuvendit Komunal të Prishtinës, e cila është thirrur për të enjten, të sjellë një zgjidhje konkrete.
Ndërmarrja “Trafiku Urban” prej ditësh përballet me vështirësi të rënda financiare, gjë që ka çuar në ndërprerjen e plotë të qarkullimit të autobusëve. Kompania ka sqaruar se shërbimi nuk mund të rifillojë deri në ekzekutimin e pagesave të pagave për punëtorët.
Situata është ndërlikuar edhe më tej nga fakti se Kuvendi i Kosovës, për shkak të mosformimit të qeverisë së re dhe mungesës së konsensusit, nuk arriti ta votojë Buxhetin e Kosovës për vitin 2026 para shpërbërjes së tij. Kjo ka lënë pezull buxhetet komunale, përfshirë edhe atë të Prishtinës, si dhe buxhetin e RTK-së.
Kryetari i Prishtinës, Përparim Rama, u është drejtuar protestuesve duke fajësuar Qeverinë e Kosovës për bllokimin e fondeve. “Paratë e komunës janë të gatshme, por Qeveria nuk po i lëshon, duke na pamundësuar t’i kryejmë detyrimet ndaj jush”, deklaroi ai.
Protesta pritet të vazhdojë edhe ditët në vijim, ndërsa qyteti mbetet pa transport publik dhe në pritje të një marrëveshjeje që do t’i jepte fund krizës.
