Një skemë e dyshuar mashtrimi është zbuluar në Prishtinë, ku dy persona që udhëtonin me një veturë me targa të Shqipërisë u furnizuan me derivate në një pompë benzine dhe, sipas punonjësit të pikës, kryen pagesën me para që dyshohet se janë të falsifikuara.
Ngjarja ka ndodhur të enjten, dhe menjëherë pas sinjalizimit, Policia e Kosovës ka reaguar. Sipas raportit 24-orësh të saj, vetura e dyshuar është ndaluar në pikën kufitare të Vërmicës. Gjatë kontrollit, te personat në automjet u gjetën dhe sekuestruan 820 euro – të gjitha në kartëmonedha prej 10 eurosh – për të cilat ekziston dyshimi i fortë se janë të falsifikuara.
“Ankuesi mashkull kosovar ka raportuar se dy persona me veturë me targa të Shqipërisë janë furnizuar me derivate dhe kanë paguar me kartëmonedha 10-euroshe që dyshohet se janë të falsifikuara. Vetura e tyre është ndalur në PKK Vërmicë, ku u gjetën dhe sekuestruan 820 euro të dyshuara të falsifikuara”, thuhet në raportin e policisë.
Pas intervistimit të dy të dyshuarve, të cilët janë shtetas të Shqipërisë, prokurori i rastit ka vendosur që njëri prej tyre të lirohet, ndërsa tjetri të dërgohet në mbajtje. Hetimet po vazhdojnë për të zbuluar nëse paratë e dyshuara të falsifikuara lidhen me ndonjë rast tjetër.
