Manchester United ka zyrtarizuar transferimin e sulmuesit Bryan Mbeumo nga Brentford, me kontratë deri në vitin 2030 dhe me mundësi zgjatjeje edhe për një vit tjetër, bëri të ditur klubi.
Sipas një burimi brenda klubit, United ka paguar 65 milionë paund (88 milionë dollarë) për 25-vjeçarin kamerunas, ndërsa edhe 6 milionë paund të tjera (8 milionë dollarë) mund të shtohen si bonuse në bazë të paraqitjeve.
Mbeumo pati një sezon të jashtëzakonshëm 2024–25 në Premier League, duke shënuar 20 gola – më së shumti në karrierë – dhe duke ndihmuar Brentford të mbyllë kampionatin në vendin e 10-të. Vetëm Mohamed Salah (29), Alexander Isak (23) dhe Erling Haaland (22) shënuan më shumë gola në ligë.
“Që në momentin që mësova për mundësinë për t’u bashkuar me Manchester United, nuk hezitova. Është klubi i ëndrrave të mia, skuadra fanellën e së cilës e kam veshur kur isha fëmijë,” tha Mbeumo të hënën.
“Mentaliteti im është që gjithmonë të jem më i mirë se dje. E di që kam forcën dhe karakterin për të arritur një nivel tjetër këtu, duke mësuar nga [trajneri] Ruben Amorim dhe duke luajtur përkrah lojtarëve të klasit botëror.”
I aftë të luajë si në krah të djathtë ashtu edhe në qendër të sulmit, Mbeumo ishte lojtar kyç për Brentford, duke startuar në çdo ndeshje të ligës sezonin e kaluar.
Ai iu bashkua klubit londinez në vitin 2019 nga skuadra franceze Troyes dhe gjatë pesë viteve realizoi 70 gola dhe dhuroi 51 asistime në 242 paraqitje.
“Statistikat e Bryan për gola dhe asistime në Premier League janë të jashtëzakonshme. Konsistenca e tij ka qenë mbresëlënëse dhe ai është ndër lojtarët më produktivë në Angli gjatë tre sezoneve të fundit,” tha drejtori sportiv i United, Jason Wilcox.
“Jemi shumë të kënaqur që kemi siguruar njërin nga objektivat tanë kryesorë para nisjes së turit parasezonal. Eksperienca në SHBA do të jetë mundësia ideale që Bryan të punojë me Rubenin dhe shokët e rinj të skuadrës në përgatitje për një sezon emocionues.”
Mbeumo është përforcimi i katërt i United këtë verë, pas transferimeve të Matheus Cunha, Diego Leon dhe talentit Enzo Kana-Biyik.
Skuadra do të zhvillojë tre ndeshje përgatitore në Shtetet e Bashkuara: më 26 korrik ndaj West Ham në New Jersey, më 30 korrik ndaj Bournemouth në Chicago dhe më 3 gusht ndaj Everton në Atlanta.
