Kryetari i Lidhjes Demokratike të Kosovës (LDK), Lumir Abdixhiku, ka bërë një deklaratë para seancës së sotme, duke theksuar se momenti aktual është një mundësi për ta parë të vërtetën në sy, para gjithë qytetarëve të Kosovës.
Sipas tij, procesi i krijimit të shumicës parlamentare duhet të jetë rezultat i përpjekjeve serioze e të vazhdueshme, dhe jo një akt i minutës së fundit për qëllime populiste.
“Sot, mandatari duhet të prezantojë shumicën, sepse kjo është thelbi i demokracisë. Për të formuar shumicën, një person që fiton zgjedhjet ose del i pari, duhet të bëjë përpjekje me çdo parti politike. Nuk mund ta lësh këtë proces për ditën e fundit. Ditën e fundit, çdo veprim i tillë shndërrohet në një shou populist,” – deklaroi Abdixhiku.
Ai shtoi se të gjithë ata që pretendojnë të udhëheqin vendin duhet të tregojnë përgjegjësi politike dhe të punojnë me seriozitet për ndërtimin e konsensusit.
Në vijim të deklaratës së tij, Abdixhiku njoftoi se nesër do të zhvillojë një takim “miqësor e konsultativ” me kryetarin e NISMA-s, duke lënë të kuptohet se dialogu mes subjekteve politike është ende i mundur, por shumë i vonuar.
Lidhur me qëndrimin e grupit parlamentar të LDK-së, ai tha:
“Deputetët e LDK-së janë të lirë të votojnë sipas bindjes së tyre, por deri më tani kanë qenë të qartë pa një marrëveshje politike, nuk ka kuptim të flitet për shumicë.”
Në përfundim, kreu i LDK-së u shpreh se, me gjasë, vendi po shkon drejt zgjedhjeve të jashtëzakonshme.
“Të gjitha shenjat tregojnë se zgjedhjet e reja janë të pashmangshme,” – tha Abdixhiku, duke lënë të kuptohet se procesi politik aktual ka arritur në një pikë ku zgjidhja mund të vijë vetëm përmes vullnetit të qytetarëve në kutitë e votimit.
